Gov. Espino at Cong. Celeste, natawa matapos idawit sa pagpatay kay Mayor Martinez ng Infanta

Cong. Boying Celeste, habang nagsasalita sa isang press conference sa Alaminos City.

Isang ngiti at tawa ang ipinahiwatig ni Cong. Boying Celeste ng Unang Distrito ng Pangasinan matapos na tanungin siya ng media kaugnay sa pinakahuling kaso na isinampa sa kanila ni Gov. Amado Espino, Jr.. kaugnay sa pagdadawit sa kanila sa kasong pagpatay kay Mayor Ruperto Martinez ng Infanta, Pangasinan noong Disyembre 15, 2012.

“Papaano mangyayari yan samantalang si Mayor Martinez na para naming kapatid ay mahigit dalawampung taon na naming kasama sa pulitika,” pahayag ng Kongresman.

Inilahad din ni Celeste ang naunang sulat nito sa National Bureau of Investigation sa Dagupan kung saan hinihiling nito ang agarang imbestigasyon matapos na barilin ang nasabing alkalde.

Sinabi rin ni Celeste na bago pa isampa ang kaso sa kanila ni Espino, nagpunta ang kapamilya ng napaslang na mayor upang ipabatid na ipinapatawag daw sila ng NBI sa Manila kaugnay ng pagsasagawa ng imbestigasyon.

Sinabi pa ni Celeste na sinabi raw sa kanya ng kapamilya ng alkalde na hindi na sila pumunta sa Maynila dahil sa kawalan ng interes dahil hindi sila naniniwala sa akusasyon na may kinalaman ang Kongresman at Gobernador sa pagpaslang.

Idinagdag din ni Celeste na nang nakausap niya ang Gobernador simple lang daw ang naging reaksiyon nito sa nasabing balita—“Marumi talaga ang pulitika nila,” wika raw ng Gobernador na tumutukoy sa kanyang mga katunggali na gumagawa ng lahat ng paraan upang siraan siya.

Maalala na kailan lamang ang daming ipinupukol na akusasyon sa Gobernador ng kampo ng kanyang mga katunggali sa pulitika gaya na lang ng pagkakaroon daw ng “blacksand mining” sa Lingayen na pinabulaanan naman ng Department of Environment and Natural Resources (DENR), pagsasampa ng kasong pandarambong o plunder sa Ombudsman dahil daw sa operasyon ng jueteng sa Pangasinan at iba pang mga akusasyon.

Bago lumabas ang mga nasabing puro mga imposibleng akusasyon, ikinalat din noong nakarang taon na naatake si Espino sa puso habang ito ay naroon sa Estados Unidos upang dumalo sa isang imbitasyon.

Kamakailan ay inaresto ng pulisya ang suspek sa Martinez case na si Ricardo “Kardo” Legarda at Richard Manuel matapos nilang likidahin ang mayor sa mismong bahay nito sa Barangay Cato, Infanta.

Halatado na pulitika naman ang tinitignan na motibo ng pagpatay kay Martinez na kaalyado ng mga Celeste. Bago ito napaslang isang rally ang isinagawa ng diumanoy militanteng grupo na binubuo ng mga estranghero at bagong salta sa Infanta na galit na galit kay Martinez dahil sa pagpayag nito sa nagaganap na “nickel mining” sa nasabing bayan.

Ang nasabing rally ay inorganisa naman ng tauhan ng isang alkalde sa Western, Pangasinan na dati raw may koneksiyon sa mga taong labas at New People’s Army.

Bigla namang pinalutang ang isang saksi na kinilala ni NBI Director Nonnatus Rojas, isang16-anyos na nagbigay naman daw ng detalyadong kuwento sa naganap na krimen.

Ang nasabing bata ay anak daw ng isang kaibigan ni Espino at naroon daw siya sa isang meeting sa mismong El Pescador Beach Resort Bolinao, na pag-aari ni Kong. Celeste ng isinagawa ang planong pagpaslang kay Martinez.

Ang nasabing bata ay isinailalim na raw sa proteksiyon at pangangalaga ng DSWD.

Hindi naman nagbigay ng anumang reaksiyon ang kampo ni Espino dahil mas nauna pa yatang ikinalat ang kaso sa media at wala pa daw natatanggap na kopya ng kaso ang punong ehekutibo.