Bangus Festival, di masyadong naramdaman

Ang mga kalahok sa "street dancing" competition

Bukod sa sobrang init ng panahon at halos hindi na makalabas ang mga tao para mamasyal, hindi gaanong kagandahan ang silebrasyon ng Bangus Festival ngayon dahil halos nilangaw din ito. Ebidensiya na rin ang reklamo ng mga ilang negisyanteng umupa ng napakamahal na puwesto na halos wala rin silang kinita sa kanilang mga negosyo.

 Kung ang pinakamahalagang  araw na bahagi ng festival  ay ang pagkakaroon ng Kalutan at Guilon-Guilon lang, baka puwedeng maging dalawang araw na lang ang pagsasagawa ng festival na yan para bawas gastos naman ang lungsod.

Alam naman natin na sobrang laki ng pondong pinapakawalan ng siyudad para lamang sa napakamahal na pagdiriwang. Nagsisilbi pa yata ito na ugat ng katiwalian dahil sa nakikitang bangayan ng dalawang sangay ng gobiyerno ng Dagupan ang konseho at ehekutibo.

Maging ang mga barangay ay umaangal na rin dahil sa maging sila ay nangangailangan na rin ng pondo para daw sa promosyon ng Bangus Festival sa mga barangay. Papaano nagkaganun samantalang karamihan daw sa mga aktibidad hindi naman ginaganap sa mga barangay kundi sa bagong tayo na mall sa Calasiao.

Nagmistulan na raw na Bangus at Puto Festival ang nangyayari dahil sa pagganap ng ibang event sa bayan ng Calasiao na parang ang isa sa mga intensiyon ay bigyan ng promosyon ang bagong mall na sobrang mahal ang mga panindad.

Maging ang premyo ng mga kalahok sa mga “street dancing” ay kakarampot na rin dahil na rin sa balita na mas lumaki ang nagagastos ng mga kalahok sa kanilang costume at bukod doon halos wala na ring matira sa premyo dahil sobrang laki din daw ang kinakabig ng mga bading na instructor  ng mga nasabing street dancer. 

Ang mga bata na kalahok na halos matumba na sa kanilang pagpe-perform sa gitna ng sumasagitsit na araw ay barya na lamang ang naiuuwi na premyo. Kung sila ay magkasakit dahil sa sobrang pagod ng kanilang katawan baka kulang pa ang napanalunan nilang premyo.

Maging ang bansag na Bangus Festival ay lumalabo na rin dahil sa pagsisingit ng ibang mga gimik gaya ng “litson at pigar-pigar” na mas tila sikat pa yata ngayon kaysa sa produktong Bangus ng Dagupan.

Kung Malabo na yang titulo na yan mas mabuti na gawin na lang siguro na “chopsuy” festival ang nangyayari sa Dagupan dahil sa halo-halong mga event ang isinasalaksak nila sa dati ay napakagandang silibrasyon ng nasabing festival.

At kung titignan mo sobrang konti na rin ang mga bisita at mga taong  nagsisipagdalo sa nasabing pagdiriwang dahil sa hindi maayos na pamamalakad ng nasabing Bangus Festival.