Sorry ni Cynthia Villar, di daw sapat

Mukhang nasobrahan ni Cynthia Villar ang kanyang propaganda at sa paghahagilap niya ng magandang sasabihin para pumapel sa mga botante, nasobrahan niya yata ang kanyang kadaldalan at pati mga nurses na Pilipino ay nalait niya sa kanyang mga pahayag.

Imbis na mapalapit siya sa mga botante, lalo pang nakasama at ikinagalit ng libo-libong nurses sa bansa ang termino niyang “room nurse” lang daw ang kinakalabasan ng mga nagtatapos ng kurso na napapadpad sa ibang bansa.

Ang hindi niya alam dahil mayaman na siya, mahirap ang trabaho ng mga nurses, karamihan sa kanila totoong halos magpa-alipin sa ibang bansa dahil sa kawalan ng oportunidad dito sa ating sariling bayan. Subalit huwag natin isantabi ang katotohanan na ang mga nurses na nagtatrabaho sa abroad ay mga bayani na tulad din ng ibang mga OFW na nagpapakahirap sa ibang bayan para lang makapag-uwi ng dolyar na mahalaga din naman sa ating ekonomiya.

Imbis na magbigay ng suhestiyon si Cynthia Villar, naging panlilibak tuloy ang tunog ng kanyang ginawang pagsasalita kontra sa mga nurses. Sa kabila ng kanyang paghingi ng sorry, nakasakit na siya ng damdamin at tila mahirap ng kalimutan ito ng kanyang mga nasaktan na nurses.

Dahil diyan Malabo daw na manalo si Cynthia Villar dahil kahit anong pilit niyang pagpigil sa kanyang ugali, lumalabas pa rin ang tunay niyang attitude kontra sa publiko.